Müşahidələr....

____________ Basabas ___________

Ağzınacan dolu marşrutda.

Hələ desən sifəti qabaq qapının pəncərəsinə sıxılan da vardı.

Sürücü:

— Bir azca ortaya sıxılın, orta boşdur.

— Zalım oğlu haradan boşdu, milləti yığıb doldurmusan içəri, salonda nəfəs almağa yer yoxdur!

Burada Gülhüseyn Hüseynoğlunun hələ 1977-ci ildə yazdığı "Qayıdacaqmı?!" hekayəsindən bir hissə yadıma düşdü:  "...avtobus parklarının rəhbər işçilərini ayda heç olmasa bir həftə bu basabasda minib-düşməyə məcbur  eləyələr. Özü də arvadları ilə birlikdə. Görsünlər bu xalq nə çəkir"

 

____________ Çörək haqqı ___________

Çörək zavodu... Çirkli dəzgahlar, ələnməmiş un, çəlləklərin (dəmir "baraban"ların) içərisində gəzən siçovullar, üst-başlarından natəmizlik yağan işçilər....

Burada un kisələrdən içərisi nə vaxtdan təmizlənməmiş, divarlarında xəmir quruyub qalmış barabanlara tökülüb yoğrulur.

Sonra kündələnib toz-torpaq basmış stolların üstünə tullanılır. Oradan da götürüb kürələrdə bişirirlər.

Müdriyyətin "təki pul gəlsin" laqeydliyindən, İşçilər işin çətinliyindən öz işlərinin mahiyyətinə varmadan belə gördükəri işin için alçaqcasına söyürlər.

Ələnməmiş unun çörəyindən yeyəndə də dişlərin altında xırtıltı səsindən iyrənirsən.

Bişirilmiş çörək dükanlara paylanılır.

Kimlər üçünsə isə çörək and inamıdır.

 

____________ Sağ ol ___________

"Sağ ol" etiket qaydası (davranış və nəzakət) üçün deyilir. Bir də görürsən birisi zəhləsi getdiyi digərinə "sağ ol" , "çox sağ ol" deyir. Guya ki, ona çox lazımdır zəhlətökən birisinin sağlığı. "Sağol" səmimi qəlbdən deyilmir.

 

____________ Araq ___________

Dükanda.

­— Xanım zəhmət olmasa bir  "çubuş" araq, 300 qr. kolbasa, bir dənə də çörək verin.

Satıcı qız arağı və çörəyi başqa-başqa sellofan torbalara yığır.

— Xanım niyə ayrı yığdınız?

Satıcı:

— Çörəklə arağı bir yerə qoymaq olmaz, günahdır.

Oğlan:

— Bəs mədədə qarışmır ki ?!

 

____________ Dalca danışmaq ___________

"Arxaca danışmaq yaxşı deyil"  ifadəsinin özü yaxşı deyil, — arxaca yalnız bəd fikirləşib, pis danışmaq yasaqdır.