Gözümü açanda nurlu dünyaya,
İlk dəfə mən səni gördüm, ana can!
Sevgi nə olduğun onda bilmişəm,
Könlümü mən sənə verdim, ana can!

Daşdan sərt iradən, gücün var sənin,
Qumaşdan zərifdir təmiz ürəyin,
Ən qatı savaşı saxlar qeyrətin,
Müqəddəs güvəncim, sənsən, ana can!

Çöhrəndə keçdiyin yollar iz salıb,
Sənin duaların məni yaşadıb.
Adın bu Vətənlə qoşa dayanıb,
Sən varsan, yox mənim dərdim, ana can!